من کی بیر دونیایا وئرمزدیم اونون بیر توکونو

گلیرم تورپاقی اوسته بوشادام غم یوکونو

داشین اوستونده آدین گؤردوم و گؤز دولدو یاشا

گوندوزوم اولدو گئجه، ایستدی غم حدین آشا

سویو تؤکدوم بیر اووج، آه ایله سیلدیم آدینی

فیکیره دوشدوم او دم،خاطیره سالدیم یادینی

آتا جان دور آیاق اوسته قوجاقین آچ بیلمه

کاش اولایدین ائشیدیدیم سسینی بیر کلمه

بو سویوق گونده نئجه تورپاق ایچینده یاتیسان؟

دی گؤروم حب لریوی اؤز زامانیندا آتیسان؟

باخگینان گؤر نه گونه دوشدو سنین خیردا بالان!

بو هارا رسمیدی مندن قوجاقین آیری سالان؟

گؤرموشم من یوخودا، ائوده منه یئر سالیسان؟

دیزین اوستونده منه هر گئجه لای لای چالیسان

سایگینان گؤر نئچه ایل وار کی سنی گؤرمه میشم؟

قالمیشام مات نئجه سنسیز دیری یم، اؤلمه میشم

آللهین درگاهینا چاتمیسان و هئچ یولو یوخ

ولی گاهدان بیر ایاق گل بالایان بوردا یولوخ

ائلیرم بیر دوعا، آللاه بیلیر و بیز ایکی میز

آللاها آند وئریرم قالمیا هیچ کیم دده سیز